Isumat.com/7:32AM, Enero 12, 2021
Duha na katawo an binawi-an hin kinabuhi ha Eastern Visayas tungod han pag-uuran ngan maraot nga panahon han nag-agi nga pira ka adlaw tobtob yana.
An PNP Regional Office in nagpahayag nga an mga namatay in tikang ha Northern Samar ngan Eastern Samar. Waray naman igpasamwak han mga otoridad an mga ngaran han mga biktima.
Usa liwat nga lalaki an nasalbar han matagbunan hiya han nagpanpan nga bukid ha luyo han iya balay ha Brgy Hindang, Borongan, Eastern Samar. Hi Remegio Alea in nag-aayad han kanal ha luyo han iya balay han magparik an bukid.
Natagbunan an katunga nga parte han iya lawas ngan nagburublig an mga opisyales han barangay ngan mga residente nga masalbar hiya ngan madara ha hospital.
Nagpapabilin gihapon tobtob yana nga ginlulunupan hin baha in kadam-an nga mga barangay ha Eastern ngan Northern Samar ngan mayda mga parte han National Highway an ginpasadhan ha trapiko tungod han mga landslides ngan baha.
Maabot naman hin 2 Mil nga pasaheros ngan motorista an stranded ha mga pantalan ha San Isidro ngan Allen Northern Samar. Kakulop han kulop (Enero 11) waray na tumgot an Philippine Coast Guard nga makabiyahe tikang ha Northern Samar ngadto ha ha Matnog, Sorsogon an mga barko tungod han maraot nga panahon.
An trabaho ngan klase ha Tacloban City in ginsuspender tikang Enero 11 han udto tobtob Enero 12 tungod gihapon hini nga sitwasyon. Kadam-an nga mga lugar han syudad labi na ha Northern barangays an ginbababaha. An usa nga kapilya ha igbaw nga parte han Villa Regina Subd ha Abucay an nahilaprak tungod han landslide. Waray naman nahisumat nga casualty dida hini nga panhitabo.
Nagreport gihapon an Office of Civil Defense-Eastern Visayas nga sobra 600 katawo ha Catarman ngan Catubig, Northern Samar an igin-evacuate ngadto hin talwas nga lugar.
Nakarahibot naman yana an magkalainlain nga mga LGUs pag-andam ngan panhatag han relief goods ngadto han apektado nga mga pamilya.
An grabe nga pag-uuran in durot han tinatawag nga “Tail-End of Frontal System” kun diin an matugnaw nga hangin tikang ha Norte ug an mapaso nga hangin tikang ha Pacifico an nagrarapo nga nakakaghimo hin “thunderstorms” ngan iginpupusdak ha tuna komo uran. Ini gindudunganan pa han “La Nina Phenomenon” nga sobra ha normal nga uran an matatabo. #
