Isumat.com/Enero 10, 2022
Ha syahan nga adlaw han implementasyon han gun ban, duha nga kalalakin-an an na-aresto dida han mga checkpoints nga gindumara han PNP ha Eastern Visayas.
Tinikangan Enero 9, 2022 iginpatuman an nasabi nga resolosyon han Commission on Elections ha panuyo nga kalikyan an kasamok samtang nagtitikaharani an piniliay.
Ha Taft, Eastern Samar nadakop an suspetsado nga hi Wilmar Cabangonay, 21 anyos, residente han Brgy Bongdo han nasabi nga bungto.
Subay han report han PNP, hi Cabangonay in nagmamaneho hin motorsiklo han makalasan hiya nga mayda na checkpoint. Tungod han paghikalasi ha iya, tigda nga nagpreno han iya motorsiklo an suspetsado ngan natumba an iya sarakyan. Nahulog in usa nga kalibre 22 nga pistola tikang han motor ngan nabuklo han mga otoridad nga mayda niya dara nga pusil.
Didto naman ha Merida, Leyte, na-aresto ha COMELEC checkpoint an suspetsado nga hi Raul Sinambong, 46 anyos, nag-uukoy ha Isabel, Leyte.
Pag-agi ni Sinambong ha checkpoint, ginpanginano han kapulisan an sulod han iya sling bag ngan natad-an in usa nga caliber 357 ngan unom nga bala. Waray kaangayan nga papeles nga nahipakita an suspetsado.
An duha nga mga nagkadadakop in gindara ngadto han mga PNP Stations han nasabi nga mga bungto ngan sasampaan han kaangayan nga mga kaso. #
