(File photo by motorcycle you blogspot)

Isumat.com/Enero 10, 2022

Naawat an kinabuhi hin usa nga tinubyanan han balaud han mahidabi an iya sinasakyan nga motorsiklo hin aksidente ha National Highway, Brgy Malaintos, Dolores, Eastern Samar hadton Enero 8, 2022 pasado alas tres han kulop.

Ginkilala an biktima nga hi Staff Sgt. Alexander Villaflor, 48 anyos, inasaw-an ngan nakadestino ha Dolores PNP Station.

Subay han imbestigasyon, hadto nga takna hi Villaflor in nagmamaneho han iya motorsiklo ngan tikadto na unta han Police Station. Pag-abot niya han eskina tikadto han estasyon, umukoy hiya basi tagan hin lugar an mga behikulo ha kaluyo nga dereksyon nga maka-agi antis hiya lumiko ha wala.

Samtang naghuhulat hiya nga maka-agi an mga sarakyan ha kaluyo nga lane, nabunggo an iya motorsiklo hin usa nga pampasahero nga jeep nga ginmamaneho-an ni Lope Acabado, 66 anyos, residente han San Julian, E. Samar.

Nahilabog an biktima tikang han iya motorsiklo ngan naligis pa hiya han jeep nga nakabangga ha iya. Kadagmitan gindara han mga rescuers ha hospital an sarhento pero igindeklarar nga dead on arrival han mga doktor.

An drayber han jeep ug an mga behikulo nga nadabi han insidente in gindara ha PNP Station para han kaangayan nga disposisyon. #