Isumat.com/10:38PM, May 25, 2020
Katapos hin haros duha ka semana nga pagmiringaw, may nahidugang nga duha ka tawo dida han ihap han natapnan han corona virus ha Region 8.
An DOH Regional Office in nagreport yana nga gab-i nga an bag-o nga Positive Cases in duha ka tawo tikang ha Tarangnan, Samar. Hira in lakip han iginpagawas nga resulta han swab samples tikang hin 92 ka tawo. An 90 ngatanan negatibo han virus, samtang ini nga duha amo an kumpirmado nga natapnan.
Hinungdan hini, nagin 28 na katawo na Sinirangan Bisayas an na-alakbatan han ginkakahadlukan nga kagaw.
Hi Patient # 27 in 16 anyos nga lalaki, samtang hi Patient # 28 in 44 anyos nga lalaki gihapon. Ha bungto han Tarangnan, umabot na hin 23 ka tawo an natapnan han virus. Dida hini nga 23, 14 na an naka-recover ug an siyam in aada ha hospital.
An mga naka-recover ha gawas han Tarangnan amo an taga Catarman, taga Calbayog, taga Catbalogan ngan duha nga tikang ha Burauen, Leyte.
Iginsumat pa han ahensya nga hapagkayana, mayda 1,835 an Suspected Cases ha bug-os nga rehiyon. # (KEVIN SIOSANA)
