Mahugot an pangandaman yana han Department of Agriculture-Region 8 ha pagsurapo han ginkakabarak-an nga paglarab han Fall Armyworm (FAW) nga nakakadarahig han mais.

     Dara hini, nagdumara hin Special Organizational Meeting/Orientation on FAW an departamento ha panguna ni Asst. Regional Director for Research and Regulations Elvira Torres upod an mga natutungdan nga mga personales han ahensya. Gintagan hin duon ni Torres nga kinahanglan an ngatanan nga empleyado han buhatan in may kinaadman kasumpay hini nga peste nga naka-apekto na han mga umhanan hin mais tikang pa han Setyembre 2019 kun diin ha Alangalang, Leyte an syahan nga nahipatik nga mayda kaso hini.

     Usa han mga pitad han buhatan amo an kadagmitan nga pag-deploy han ira Quick Response Team (QRT) basi makit-an kun tinood gud man an mga report han apektado nga corn areas ngan pag monitor han apektado na nga mga umhanan ha bug-os nga rehiyon.

     Ha deri pala maiha, an syudad han Ormoc ug an bungto han Hilongos, Leyte in nagpasabot na ha DA nga mayda na mga insidente hin FAW infestation ha ira lugar. Dida han manginano an grupo han ahensya, ira gud man napamatud-an nga 12 ektaryas na hin mais an ginpeste ha Ormoc samtang gin iimbestigar pa an didto ha Hilingos.

     Kasumpay hini, magkaka-ada hin katitirok an haros dos syentos nga Agricultural Extension Workers ha Siniringan Visayas basi matagan hira hin kina-adman ngan mga paagi han insakto nga pagsusi ngan pagpoypoy hini nga ulod.

     Ginlalauman naman nga an QRT ug an mga extention workers in kadagmitan nga makikigsumpayan ha mga mag-uuma han mais ha aton dapit basi matagan hira han kaangayan nga technical assistance.