Isumat.com/3:02PM, Marso 22, 2021
Nagpaturok han CoVid Vaccine hi Tacloban City Mayor Alfred Romualdez yana nga adlaw, Marso 22, 2021.
Usa nga nurse han Department of Health nga naka-assign ha City Health Office an nag-administer han injection ngadto han amay han Tacloban pira pala ka oras an nakalabay. Hi Romualdez an ginpakunahan katapos han screening ngan assesment ni City Health Chief Dr. Gloria Fabrigas.
Hi Romualdez nga natapnan ngan nakatalwas tikang han Covid-19 pira na ka semana an nakalabay, in nagdig-on nga usa han epiktibo nga mga pamaagi pagsurapo han kagaw amo an pagpabakuna, sanglit iya gud gin-aaghat an publiko nga magpahi-agom hini kun magin abilable na ini ha kadam-an nga mulopyo.
Hadin nag-agi nga mga adlaw, an mga Health Personnel ngan Frontliners han Tacloban an ginbakunahan na, matuod deri pa ngatanan.
Hi Romualdez an gisasyahani nga LGU Official ha Rehiyon Otso nga nakatagamtam han bakuna. An 2nd dose han bakuna in igtuturok ha iya paghagos hin tulo ka semana.
Han sobra usa ka tuig nga pag-antos han pandemya, 2,093 na katawo ha Tacloban an nagpositibo han virus ngan 1,973 an naka-recover. 52 naman an nahilista nga naawat an kinabuhi ngan hapagkayana 68 an aktibo nga mga kaso. #
