Isumat.com/Hunyo 18, 2021

Iginbuyagyag ni House Majority Leader ngan Leyte 1st District Representative Ferdinand Martin Romualdez (FMR) nga personal niya iginka-iristorya an iya kapaturan nga hira anay Senador Bongbong Marcos (BBM) ngan Senador Imee Marcos.

Ha notisya han Philippine Daily Inquirer, hinsabutan nga natabo an pagkaharampang han magparaptod hadton Hunyo 14, Lunes nga adlaw. Dida han mao nga iru-istorya upod gihapon nira hi anay Pangulo Gloria Macapagal-Arroyo.

Nagsumat hi FMR nga an ira pagkirigta in basi makigkumustahay ha tagsa-tagsa ngan barubalyu hin mga ideya ngan pag-aro hin kasalagdunan. Partikular nga ginngaranan ni FMR hi Senador Imee nga amo an nagpaki-ana kun ano an ira mga plano ha pulitika. Matuod, waray mag-asoy an kongresista kun ano ini nga ira mga plano.

Dida han nasabi nga katitirok, nagpasalamat hira BBM ngan Senador Imee kan Arroyo tungod han pagbulig niya han magbugto dida han nag-agi nga mga eleksyon kun diin ginbuligan an ira kandidatura han anay presidente.

Kadungan hini, nagpasamwak gihapon hi FMR nga pakukusgon pa an alyansa ha butnga han mga partido nga Lakas-NUCD ngan Hugpong ng Pagbabago (HNP). An magbabalaud amo an presidente han Lakas, samtang hi Davao City Mayor Sarah Duterte an nagungulo han HNP.

Sumala kan Romualdez, maiha na nga nagkakasugbong an duha nga partido, pero ira pa pahuhuruhugton an ira alyansa samtang nagtitikaharani an 2022 Elections.

Hi FMR in nalutaw an ngaran nga posible magin running-mate ni Sarah kun dumalagan an alkalde ka-presidente. Hadin Martes, hi Presidente Rodrigo Duterte in nagsering nga iya ig-uundong an kandidatura ni FMR kun kumandidato ka VP an Leyte Congressman.

Mayda liwat mga hurob-hurob nga hira BBM ngan Mayor Sarah an magta-tandem.

Ginklaro naman ni FMR nga hapagkayana, waray pa niya desisyon kun ano nga posisyon an iya dadalaganan dida han tiarabot nga piniliay.

Hi FMR in pumakadto ha Davao kun diin personal niya iginpa-abot an iya pakig-usa han pagsa-urog ni Mayor Duterte han iya kaadlawan han nag-agi nga semana.

Hira BBM ngan Senador Imee in pumakadto gihapon ha Davao ha parehas nga panuyu-anan.