Isumat.com/ Disyembre 1, 2022
Nagdara na liwat hin onor para han Pilipinas an atleta nga hi Mariano Masano han makadaog hiya hin gold ngan silver medals dida han gindudumara nga 2022 Thailand Track & Field Open Championships ha Pathumbati, Thailand.
Hi Masano nga taga Mayorga, Leyte amo an nagin kampeon dida han Mens’ 800 Meter Run pinaagi han iya time clocking nga 1:54:07, kun diin iya pinanmerde an taga Hongkong nga nakakuha han silver ug an bronze in nadara han entry han Thailand.
Silver medal naman an nakolekta ni Masano dida han Mens’s 1500 Meters kun diin an Gold Medalist amo an iya kausa ha RP Team nga hi Alfrence Braza.
Hi Masano in beterano na ha mga international competitions kay nakakuha na ngani hiya hin mga medalya ha Vietnam Open sugad man han 2019 SouthEast Asian Games nga gindumara denhi ha Pilipinas.
Nagin atleta ngan estudyante hiya ha Leyte Sports Academy kun diin damo nga medalya an iya nadag-an samtang miembro hiya han Eastern Visayas Athletic Association nga nakikiglantugi ha mga Palarong Pambansa.
Nagin atleta gihapon hiya han San Beda University ngan nakahikay gihapon hin mga medalya ha National Collegiate Athletic Association.
Hapagkayana, hi Masano in 4th Year Physical Education Student ha UP-Diliman kun diin damo na gihapon nga daog an iya naangkon ha Universities Athletic Association of the Philippines.
Dida han iya facebook post, hi Masano in tim-os nga nagpasalamat ha Makagarhum, sugad man ha iya coach, kan Mayorga Mayor Alexander de Paz, an iya pamilya ngan mga kasangkayan.
Sering pa niya, iya iginkakaparayaw ha mga international tournaments nga nagtataglawas hiya han Pilipinas ngan Mayorga, Leyte. #
