Isumat.com/Mayo 13, 2021
Iginsalikway hin magbugto nga kalalakin-an an ira armado nga pakigbisog kontra han gobyerno han sumurender hira ha mga otoridad ha Northern Samar hadin nag-agi nga adlaw.
Dida han impormasyon tikang ha Northern Samar Provincial Police Office, an nagsurender in ginkilala nga hira alyas Ka Ariel, 51 anyos; ug an iya bugto nga hi Ka Aries, 43-anyos. An magbugto in miembro han Front Guerilla Unit han Front Committee 1 ha ilarum han Sub Regional Committee 1.
M-16 nga riple ngan mga bala an igintubyan ni Ariel, samtang an iya manghod in nagsurender hin kalibre 45 nga pistola upod in mga bala.
Iginsaysay han magbugto nga api hira hin mga bayolente nga gi-os han New Peoples Army sugad han pagsulong hin mga kampo han kasundaluhan ngan panggama han mga tropa han gobyerno.
Lakip han ira nadadabihan amo an magkadungan nga pag-atake han mga detachment han Philippine Army ha Brgy Palanit ngan Brgy Salvacion, San Isidro, Northern Samar hadton 1991. Dida hini nga mga insidente, an grupo han mga rebelde in nakakuha hin mga armas tikang han kampo. Labot la hini, nagbubuhat gihapon hin extortion o pangikil an ira grupo.
Nagsumat pa hira nga nakasantop hira pagbalik ha piyod han balaud kay karuyag na nira hin mahimyang nga kinabuhii upod an ira pamilya.
An 1st Northern Samar Provincial Mobile Force Company ha panguna ni PMajor Edwin Oloan an naghimo han negosasyon basi mapasilitar an pagsurender han magbugto.
Hapagkayana, hira Ka Ariel ngan Ka Aries in aada ha kustudiya han mao nga PNP Mobile Force Unit samtang gin-aareglar an mga dokumento basi maka-agom hira han kaangayan nga benefecio tikang ha gobyerno pinaagi han Local Social Integration Program.
Kasumpay hini, hi Northern Samar Provncial PNP Director Col Arnel Apud in nagpasalamat han magbugto han ira pagtapod ha gobyerno kadungan han iya panawagan ngadto han iba pa nga NPA members nga bumalik na gihapon ha panig han gobyerno. #
