Isumat.com/Mayo 18, 2021
Tungod han Covid-19 Pandemic, an mga lokal nga pan-gobyernuhan in nagkaka-iba-iba an diskarte basi mabalanse an pagpugong nga maglarab an kagaw ug an pagpatukdaw han ekonomiya.
Ha larangan han turismo, magkatarihas an mga pitad nga iginpasunod yana han Ormoc City ngan probinsya han Biliran. An mga tourist destination ha Ormoc in ginpasadhan, samtang aabrihan na liwat an sugad hini nga mga parasyadahan ha Biliran.
Hadin nakalabay nga adlaw, iginmando han alkalde han Ormoc, Richard Gomez an temporaryo nga pagpasara han ngatanan nga tourist spots han syudad tobtob Mayo 31, 2021. Ini an ginhimo nga gi-os han LGU basi kabalabgan nga maghinitaas pa an kaso han Covid ha ira lugar.
Duha na ka semana nga pirmi may natatapnan ha Ormoc ngan may mga adlaw nga sobra hin napulo ka tawo an na-aalakbatan han virus. Lapos na ha usa ka yukot an nagpositibo nga Ormocanon han Covid, ngan hapagkayana sobra 60 an aktibo nga kaso samtang 18 na an binawi-an hin kinabuhi.
Ha luyo nga bahin, katapos hin duha ka semana nga suspensyon han operasyon, aabrihan na liwat an mga tourist destination ha Biliran.
Dida han impormasyon nga nahikay han Isumat.com, plano han gobernador han probinsya pagpagawas hin Executive Order mahitungod hini nga pitad ngan posible hiton Mayo 21, abri na liwat an mga tourist sites.
Pero sumala han report, an tutugutan la nga makapasyada amo an mga Biliranon la anay ngan deri pa puede an tikang ha gawas han lalawigan.
Igmamando gihapon nga tubtob la ha 50 porsyento han kapasidad han tourist spots an igtutugot nga makasulod.
Labot la hini, tutugutan na gihapon han LGU an 50 porsyento nga matambong ha mga katitirok sugad han kasal, birthday ngan iba pa nga karigodigo.
Ginklaro gihapon han surok han impormasyon nga puede pa mabag-o ini nga mga plano kay mayda pa man pira ka adlaw antis igpagawas an kamanduan ngan posible magbag-o pa an sitwasyon parte han Covid didto han probinsya.
An bug-os nga Sinirangan Bisayas in aada ha Modified General Community Quarantine (MGCQ) nga amo an gihahabubu-i nga klase hin kwarentina. Dida han Mayo 17 nga report han DOH Regional Office, mayda 644 nga Active Cases an rehiyon.
Umabot na ha 19, 235 an nagpositibo han kagaw kun diin 18,299 (95%) an naka-recover ngan 292 (1.5%) an tumalikod ha kadayunan. #
