Isumat.com/7:13AM, November 20, 2020
Ha bisan ano nga sitwasyon, mayda gud masingabot nga katawhan o mga grupo basi makapangowat ha igkasi-tawo, ug natatabo na liwat ini yana ha pangaro hin ayuda para ighatag ha mga biktima han sunod-sunod nga bagyo ha Luzon.
Hi Samar 1st District Congressman Edgar Mary Sarmiento in nagbuyagyag nga an iya opisina in gingagamit hin mga indibiduwal ha pag-solicit hin hinabang tikang ha magkalainlain nga sektor bisan kun waray sugad hini nga aktibidad an iya buhatan.
Sumala kan Sarmiento, may katawhan nga nangangaro hin donasyon ha mga negosyante ngan iba nga organisasyon kun diin nagpapahayag nga an opisina han magbabalaud an nagdudumara han pagtirok han mga hinabang para han mga biktima han kalamidad.
Kasumpay hini, nagpahimatngon an kongresista ha publiko nga deri magpa-owat ngan deri dayon tomood ha mga indibiduwal o hugpo nga nangangaro hin donasyon. Sumala ha iya, kinahanglan beripikaron gud hin maupay kun tinood an nasabi nga panuyu-anan.
Nanawagan hi Sarmiento ha NBI nga maglunsad dayon hin paghalpat hini nga mga katawhan basi deri na magpadayon an tinuyaw nga aktibidad. #
