Isumat.com/8:09AM, November 19, 2020
Papas-anon han mga Samarnon an pagbayad hin dako nga kantidad katapos la nga tangdu-an han Sangguniang Panlalawigan (SP) an 1.3 Bilion Pesos nga uutangon han probinsya ha Development Bank of the Philippines.
Kakulop, Nobyembre 18, nakalusot ha sesyon han SP an nasabi nga balaud nga amo an maghahatag hin gahum kan Samar Governor Michael Tan nga humuram han mao nga kantidad ha DBP basi mapondohan in magkalainlain nga proyekto han lalawigan.
Dida han botosay, pito an pabor han pag-utang ngan upat an tumipa. Pira ka bulan antis ini nga sesyon, nagin dako nga iristoryahon ha Samar an plano nga pag-utang. Kadam-an nga sektor an nagpabati hin kabaraka tungod han mga poroyekto nga deri daw kinahanglan pero igindidig-on nga mapondohan. Mayda liwat mga grupo an nagsering nga nagpapanunubra an budget han pira nga proyekto sugad han reclamation projects.
An iba nga mga mulopyo ngan organisasyon in nahuhulop nga posible ini magin surok hin anomaliya labi na gud kay tikaharani na an pinili-ay.
Ugsa pa an sesyon kakulop, nagkaada anay hin mapaso nga balingkutay an mga kaapi han konseho tungod han presensya han mga kaapi han media. An mga Board Members nga pabor han pag-aprobar han utang in nagdig-on nga deri puede an bisan hin-o nga tawo ha sulod han session hall labot la ha ira. Ini in tungod han Social Distancing Protocol. Nagpabati pa hin kahadlok an senior citizen nga Board Member nga bangin hiya matapnan ingkaso mayda nagdadara han virus.
Nagbotosay an mga kaapi han konseho kun makakatambong han sesyon an mga taga media. Sumala pa han pira nga kaapi han SP, angay la nga magin saksi an mga taga-mantalaan basi maseguro nga abri ha publiko ngan waray ginsesekreto dida han pag-aprobar han utang.
Pero ha botos nga 7-4, nakadaog an napabor nga deri pasudlon an kaapi han media. An umuyon nga aprobaran an pag-utang ngan deri pa-atenderon an mga taga media amo hira Board Members Fe Arcales, Bebot Nacario, Lee Zosa, Bembot Bermejo, Elpa Estorninos, Carlo Latorre ngan Christian Onate.
An tumipa han pag-utang ngan karuyag nga makasulod an taga media amo hira Julius Mancol, Mike Ayong, Alfred Serrano ngan Regina Rabuya. #
