Isumat.com/Oktubre 29, 2021

Napakyas in kadam-an nga kapulisan han ira tinguha nga makagrehistro komo mga botante han Tabontabon, Leyte han sitahon ngan pamaki-anhan hira ni Mayor Efren Redona han nasabi nga bungto.

Natabo ini hadton Oktubre 26, 2021 kun diin 30 tobtob ha 50 nga kapulisan an umabot ngadto han bungto basi magparehistro ha buhatan han COMELEC. Han ira pagsulod han munsipyo kun diin namumutang an opisina, napa-usa an kadam-an nga katawhan upod na hi Redona han ira presensya.

Ginsita hira han alkalde ngan ginpaki-anhan kun ano an ira toyo. Subay han interview han iFM-RMN kan Redona, nagsering an usa nga pulis nga gindara hira ngadto han ira team leader nga nagngangaran kan Art Gervacio. Hira in minanduan nga magparehistro didto komo absentee voters.

Labi na nga nahipa-usa hi Redona kay nahipatik dida han logbook han munsipyo nga an address han kapulisan in ngatanan didto ha Brgy Bonifacio han mao nga munsipalidad. Tungod hini, ginsita hira han alkalde kay deri hira mga residente ngan deri liwat hira nakadestino ha Tabontabon.

Igin-asoy pa ni Redona nga nagsumat ha iya an pira nga kapulisan nga naka-assign daw hira ha PNP Regional Office. Kasagaran hini nga kapulisan in mga batan-on pa, sering pa ni Redona.

Dara han panmaki-ana ngan pagsita han alkalde, waray madayon an pagparehistro han nasabi nga mga personales han PNP.

Dida gihapon han nasabi nga interview, iginsaysay ni Redona nga dako an iya pagtoo nga mayda hitaas nga opisyal han PNP an nagpapaluyo hini nga gi-os han kapulisan. Sumala ha iya, ini nga PNP Official in nakatalaan magretiro ha serbisyo ngan maliwan o ma-substitute hin usa nga kandidato ka mayor han bungto.

Iginpahayag pa ni Redona nga an barangay kapitan han Brgy Bonifacio in paryente han nasabi nga opisyal han PNP.

Dako gihapon an paghipa-usa ni Redona nga hihimoon nga rason an pagigin absentee voter para magparehistro didto han bungto. An usa nga tawo kun naka-rehistro na in deri na kinahanglan magbalhin hin lugar basi magpalista utro. An absentee voter in nag-a-apply la ha COMNELEC ngan gintutugutan hira pagbotos usa ka bulan antis an opisyal nga petsa han eleksyon ngan makakabotos la para han national position candidates ngan deri puede han lokal nga kandidato, sumala pa han alkalde.

Igindig-on han alkalde nga mahimyang an Tabontabon tikang pa hadto nga mga panahon, sanglit nababaraka hiya nga posiblle magdurot hin kasamok kun magkaada hin presensya didto ini nga kapulisan labi na nga natikaharani na an pinili-ay.

Kasumpay hini, hi Redona in nagpadara hin komunikasyon ha Office of the President sugad man ha liderato han PNP han rehiyon ug ha probinsya han Leyte nga panginanoon ini nga insidente ngan kabalabgan an sugad hini nga mga plano ha ti-arabot nga panahon.

Re-electionist komo alkalde han Tabontabon hi Redona. Maabot naman ha 11 Mil an ginbabanabana nga mga botante han bungto. 16 nga barangay an nagkokomponer hini nga 5th Class Municipality. #