Isumat.com/Oktubre 27, 2021
Nag-antos hin depresyon tungod kay waray matuman an iya hingyap nga magpakasal han iya oyab an gintutudlok nga rason han pagpakamatay hin usa nga lalaki ha Javier, Leyte hadton Lunes, Oktubre 25, 2021.
Dida han inisyal nga imbestigasyon han mga otoridad, nadiskubre han pamilya han biktima nga nabitay na an lawas han 20-anyos nga ulitawo pasado alas-5 han kulop hadto nga adlaw. Nylon nga pisi an iginhigot han biktima ha iya li-og ngadto han kisame han ira balay.
Subay han imbestigasyon, an biktima in nagtrabaho komo construction worker ha bungto han Mambajao, Camiguin. Samtang didto hiya han nasabi nga lugar, nagkaada hiya hin oyab.
Nagplano an mag-consuelo nga mag-uupod hira ha Leyte ngan magpapakasal. Pero tungod han mga patakaran han pagbiyahe dara han pandemya, waray maka-upod an babaye ug an biktima la an naka-uli ha Javier.
Hinungdan hini, an ulitawo in nag-antos hin depresyon nga nakagduso ha iya nga utdon an iya kinabuhi pinaagi hin paghikog, sumala pa han imbestigasyon. #
