Isumat.com/Setyembre 28, 2022
Mayda na bag-o nga mangungulo han Abuyog Community College katapos la nga mapili hi Dr. Clemelle Montallana komo bag-o nga presidente han eskwelahan.
Kakulop nga adlaw, Setyembre 27, 2022, an 11-katawo nga Board of Trustees in nagdesisyon nga hi Montallana an bag-o nga presidente han ACC. Dida han upat nga kandidato han mao nga posisyon, hi Montallana in naka-angkon hin napulo nga botos tikang han onse nga pumipili.
An 49-anyos nga bag-o nga presidente in magdadara ngadto ha ACC han iya hilawig ngan dako nga eksperiensya ha larangan han panutduan ngan pagkapot hin institusyon. Hi Montallana in nagin Director han Leyte Normal University San Isidro Leyte Campus, Vice-President for Administration and Finance ngan Physical Plants and Facilities Director han LNU (Main Campus-Tacloban).
Nakagtapos hiya han kurso nga Natural Sciences ha LNU ngan hiya in Doctor in Human Resource Management ngan Public Administration, labot la han iya pagigin propesor ha LNU. Hiya in usa gihapon nga Career Executive Service Eligible (CESO).
Pamumunuan ni Montallana an sobra usa ka gatos nga personales han ACC kun diin sobra singko mil an mga estudyante han nasabi nga eskwelahan. Nakatalaan hiton Oktubre an opisyal nga paglingkod komo pangulo han ACC an taga Oras, Eastern Samar ngahi Montallana.
An ACC in may mga kurso nga BS Criminology, Bachelor in Elementary ngan Secondary Education, BS Entrepreneurship, BS Hospitality Management, BS Information Technology, Senior High School ngan Vocational Courses.
An eskwelahan in nagseserbe han mga estudyante kun diin kasagaran ha ira in tikang ha Abuyog, Mahaplag, Javier, Macarthur ngan Mayorga. An ACC in aada ha ilarum han superbisyon ngan regulasyon han Commission on Hugher Education ngan Department of Education.#
