Isumat.com/Hulyo 23, 2021

Duha nga mga senior citizens an naawat an kinabuhi dida hin magkalain nga insidente ha Northern Samar ngan Leyte samtang hira in naniningkamot nga pagtuhayon an kasamok nga nagdadabi han ira tagsatagsa nga umangkon.

Hadin Hulyo 21, namatay hi Francisco Lagrimas, 64 anyos, residente han Brgy Bubulosan, Laoang, N. Samar. An suspetsado in ginkilala nga hi Angelo Lagrimas, 21 anyos, ngan umangkon han biktima.

Dida han inisyal nga imbestigasyon, nakit-an ni Francisco nga nag-aaway an suspetsado ug an ka live-in partner hini ngan nagpruweba an biktima nga pagtuhayon hira. An ginbuhat lugod han suspetsado, ginbunobuno an biktima.

Nag-antos hin pito nga binun-an hi Francisco nga amo an hinungdan han iya kamatay. Kadagmitan naman nga na-aresto an suspetsado.

Hinsabutan gihapon nga antis an panhitabo, nagtagay-tagay pa an biktima ug an suspetsado upod an ira kasangkayan.

Didto naman ha Isabel, Leyte, tumalikod ha kadayunan hi Leonardo Nepumuceno nga gin-aalegar ginkastigo han iya umangkon.

Natabo ini ha Brgy Marvel, pasado alas 8 han gab-i, Hulyo 22, 2021 kun diin an 67-anyos nga biktima in nagsasaway han nag-aaway nga iya umangkon ug han amay hini.

An suspetsado in ginkilala nga hi Dindo Nepumuceno, 31 anyos, drayber ngan residente gihapon han nasabi nga lugar.

Subay han report han Isabel PNP, an suspetsado ug an iya amay in mapaso an argumento, sanglit nagpruweba hi Leonardo nga pagtuhayon an iya mga paryente nga nag-aaway.

Nahimurangtan lugod ni Dindo an biktima ngan iya ini ginpanununtok. Natumba hi Leonardo ngan nahimalmal an ulo ha semento. Gindara ha hospital an biktima pero gindeklarar nga dead on arrival.

Na-aresto naman dayon an suspetsado ngan nasabtan han kapulisan nga hubog ini han matabo an krimen. #