An may mga reklamo parti han mga pa bahay nga proyekto han National Housing Authority (NHA) in pwede pumakadto ha Opisina han Department of Human Settlement an Urban Development (DHSUD) dinhe ha Rehiyon otso .
Ini an gin sumat ni Engineer Evelyn Bobier and Director han mao nga buhatan ha interview han 99.1 RMN I FM Tacloban ha programa nga “Straight to the Point”.
Sumala pa kan Engineer Bobier nga damo nga mga problema an na diskubrehan han ira opisina han pag patuman han mga Yolanda Housing Projects sugad han ka sub-standard han ka himo han pira han mga housing units, ka waray linya han tubig ngan kuryente, ka harayo han lugar nga gin tindugan hini, rason nga damo nga mga pa bahay an waray paka ukyi tubtub yana nga an iba ngani in nagka guguba nala.
Sugad pananglitan han housing project ha bungto han Tanauan, Leyte nga waray pa ngani ka ukyi kay waray linya hin tubig ngan kuryente aaydon na liwat han NHA. Ha bungto han Palo naman mayda housing project nga harayo an kina mumutangan hinungdan nga na dire pag ukoy an mga benificiaries kay problema liwa han ira pag pakabuhi.
Ini nga problema in gin irostoryahan na nira ngan han Regional Manager han NHA Engr. Constancio G. Antiniero ngan han mga mayors nga nakaka sakop han mga housing projects nga kon diin ini na himumutang agud matagan hin solusyon basi tibway ma ukyan na mga ini.
Gin klaro pa ni Engineer Bobier nga mayda mangud gin himo nga mga housing projects ngan an obligasyon han pag butang hin linya han kuryente, tubig ngan han pag kalsada in reponsabilidad na han usa nga local government units.
