Isumat.com/Setyembre 29, 2023
Ginlalauman nga dako an magigin bulig ha Northern Samar han pagtitindugon nga Wind Energy Project didto han mao nga probinsya.
An nasabi nga proyekto in tutukuron ha bungto han San Isidro ngan nakatalaan tikangan an konstraksyon hini antis matapos ini nga tuig ngan target nga umarangkada an operasyon han proyekto hiton 2025.
An Aboitiz Power Corporation in nagpirma hin Joint Venture Agreement kaupod an Vivant Energy Corporation ug an Singapore-based Vena Energy para han mao nga proyekto. Ini nga pagtibhong han tulo nga grupo in gintawag nga Lihangan Wind Energy Corporation.
Kun matapos ini, makakagdurot ini hin 206 megawatt nga enerhiya para ha Northern Samar.
Dida han impormasyon nga nahikay han IsumatNews, waray pa igpahayag han mao nga korporasyon an kantidad nga ira gagastuson para han proyekto ngan ini in ginhihimangrawan pa.
An nasabi nga mga kompaniya in mayda na gihapon natukod nga mga proyekto ha iba nga parte han Pilipinas ngan sumala ha ira, kaparte ini han ira paningkamot nga makabulig han panginahanglan hin kuryente pinaagi han renewable and clean energy projects.
