Isumat.com/9:25AM, May 28, 2020
Tungod han abtik ngan listo nga pagmanman han mga otoridad han Borongan City, ira nabisto in usa nga lalaki nga nakalusot pag-abot ngadto bisan kun waray hiya mga papeles.
Ha usa nga meeting upod kan Governor Ben Evardone ngan mga alkalde han lalawigan, hi Borongan Mayor Jose Dayan Agda in nagbuyagyag nga usa nga tawo nga na-stranded ha Legaspi City an nanlisbot ngan naka-uli ha ira lugar bisan waray dara nga mga papeles nga magpaparig-on han iya pangilal-an ngan kun waray hiya katapni han corona virus.
Sering pa man ni Agda, maupay nala nga aktibo an monitoring team han syudad sanglit ira nasabtan hin kadagmitan an kinamumutangan hini nga tawo. Dara hini, ira ginbalhin ini nga tawo ngadto han Isolation Facility han syudad para mag-kaada han duha ka semana nga kwarentina.
An istorya ni Mayor Agda an iya iginpabati dida han hiruhimangraw kakulop kun diin ginpangunahan ni Evardone an paghimo hin mga pamaagi basi makaseguro an probinsya nga magin talwas han corona virus ha pagka-abot han mga na-stranded ngan mga OFWs.
Sumala pa han report han Borongan City Information Office, mahugot an kamanduan han Task Force nga bisan hin-o nga tikang ha iba nga lugar ngan iba nga nasud in kinahanglan mag-kwarentina hin katorse ka adlaw ha mga Isolation Facilities han probinsya.
Kadungan hini, nagpabati han iya tim-os nga pagpasalamat hi Agda ha mga opisyales ngan mulopyo han iya syudada dara han ira pagburublig sanglit nagpapabilin nga covid-free an lugar.
Gin-aghat gihapon han alkalde an mga residente nga igpadayon an kooperasyon ngan paghirot ha atubangan hini nga krisis ha panlawas. # (KEVIN SIOSANA)
