Isumat.com/9:31AM, June 9, 2020
Igindig-on ni Konsehal Marvin Lim han Taft, Eastern Samar nga waray ginsupak nga health protocols kasumpay han COVID-19 an iya pamilya. Ini an nagin kabatunan ni Lim han nagin pahayag kagab-i ni Eastern Samar Governor Ben Evardone nga gin-aandam na han mga otoridad an pagsampa hin kaso kontra kan Lim ug an iya kag-anak.
Nagsering hi Lim nga ira ginsunod an mga guidlines han LGU-Taft kun diin nahipapatik nga an hin-o man nga na-stranded nga residente ha iba nga lugar o OFW nga mabalik ngada han bungto in kinahanglan mag-kwarentina didto han kanan bungto Monitoring and Treatment Facility ngan puede liwat an Home Quarantine.
Kagab-i, nagbuyagyag hi Evardone nga waray sumunod han aludayday hi Lim ug an iya kag-anak nga hira Diego ngan Elsa Lim kay waray hira pumakadto han Quarantine Unit ha Taft Eelementary School ngan nagderetso ha ira kalugaringon resort. Nagsering pa an social media post ni Evardone nga an Municipal Health Officer han bungto ngahi Dr Imelda Abenio in nag-interbener basi makag Home Quarantine an pamilya.
An Pamilya Lim in umabot kakulop tikang ha Manila ngan waray pumakadto han Quarantine Unit ha Taft Elementary School ngan waray makigbali han police escort ngan sumulod lugod ha ira resot, pahayag ni Evardone.
Komo kabatunan, nagsering hi Konsehal Lim nga mayda nira kumpleto nga mga papeles tikang ha Manila nagpapakita nga negatibo hira han corona virus. Iya pa igindugang nga ira katungod nga magpili kun hain hira mag-kwarentina kay amo man ini an guidelines han LGU. Para han iya pamilya, mas talwas hira kun aadto hira ha ira balay.Bisan ngani hi Konsehal Araya in naka Home Quaratine gihapon, sering pa ni Lim.
Antis pa hira umuli, nakigsumpayan na hira han Municipal Health Officer sanglit segurado hira nga waray nira natatalapas nga balaud. Gin-ayat pa ni Lim an hin-o man nga agrabyado nga maghimo hin kaangayan nga aksyon kontra ha ira kun mag positibo hira katapos hin duha ka semana.
Kasumpay hini, hi Lim in nag-apilar nga deri halu-an hin pamulitika an natatabo nga krisis yana tungod han COVID-19. #(KEVIN SIOSANA)
