Isumat.com/10:57AM,May 5, 2020
Posible nga umatubang hin kaso hi Vice-Mayor Edgar Boco han Hernani, Eastern Samar dara han alegasyon han deri maupay nga iya ginawi-an ha checkpoint ha San Juanico Bridge (Leyte Side).
Dida han blotter ha Abucay-Tacloban PNP Station, hi Boco ug an iya mga kaupdanan in umulpot dida han checkpoint sakay hin Sports Utility Vechicle kakulop han pasado alas 5 han kulop. Gin-flagdown hira han mga kapulisan basi magdumara han inspection para han mga nagkakasulod ha Tacloban.
Gin-aaro-an an grupo nira Boco han kaangayan nga mga dokumento sugad han Medical Certificate ngan Travel Pass, pero waray hira makag presentar han nasabi nga mga rekesitos. Dida hini, nag-alsa boses an opisyal ngan iya na ginturutudlok an mga kapulisan ug haros naguli-at na hiya han pagsering nga: Kay-ano nga damo man it iyo ginpipinan-ngaro, baman an iba nga bungto nga amon gin-agi-an deri man sugad hini?
Nagka-ada na hin deri pagkasarabot sanglit iginreport han mga kapulisan ha ira team leader an natatabo ngan nagka-istorya hira ni Boco. Nagsering an Team Leader nga deri angay sugad hini an pagtratar han iya mga tawo kay nagsusunod la hira han patakaran ngan dida na kumalma hi Boco.
Gindara hira ngadto ha Abucay PNP Station para han kaangayan nga disposisyon ngan dokumentasyon. Dara hini nga binuhatan han Bise-Alkalde, gin-aadman yana han kapulisan an posible nga kaso igsampa kontra ha iya.
Hinsabutan gihapon nga dida han sarakyan han Vice Mayor, sobra an kadamo han pasaheros han igintutugot yana nga kadamo han pasahero dara han social distancing.
Nakasagap hin impormasyon an Isumat.com nga kaupod daw ni Boco an iya nanay nga magpapa-dialysis ha hospital.
Dida han guidelines han kwarentina, nakapatik nga an mga tawo nga masulod ha Tacloban in kinahanglan kumpleto an dukumento bisan pa ngadto ha hospital an ira toyo. #
