Isumat.com/6:09AM, Marso 19, 2021
“An isla han Homonhon in sagrado nga lugar sanglit angay la nga protektaran ini ngan deri pagtamas-tamasan.”
Ini an mahugot nga panawagan ni Fr Christian Ofilan, an kura paroko han San Juan de Bautista nga Singbahan Katoliko ha Homonhon. Iya ini iginpabati katapos gud la han Santos nga Misa nga usa han dagko nga mga aktibidadis kasumpay han pagtigaman han ika-500 nga anibersaryo han pag-abot han grupo nira Ferdinand Magellan didto han nasabi nga isla hadton tuig 1521. Ini nga selebrasyon in pagtigaman gihapon han paghimugso han Krityanismo ha Pilipinas.
Sumala kan Ofilan, an aton mga ka-apoy-apoyan an naningkamot nga magpabiilin nga sagrado ngan puno hin respeto an isla, pero paghagos hin 500-anyos, nagin iresponsable an katawhan ngan ginbaliwaray an importansya han kalibungan.
An Homonhon Island in riko han mga mineral nga nickel ngan chromite nga nagin rason han operasyon han mina didto tikang pa han dekada 90. Tungod han pagmina, kadam-an nga parte han isla an nadistroso an natural nga karikuhan.
Kasumpay hini, hi Ofilan in nanawagan kan Presidente Duterte, sugad man an mga opisyales han probinsya han Eastern Samar nga gumi-os basi matapos na an mining operations didto. Iya gihapon gin-aghat an katawhan nga magburublig basi protektaran an isla.
Sering pa han padi, ini nga selebrasyon in pagpahinumdom han Ginoo ha katawhan nga kaparte han aton misyon amo an matadong ngan hapsay nga pagtimangno han kalibungan nga ginhimo han Makagarahum.
Komo ehemplo han pagproteher han kalibungan, hi Ofilan ug an mga residente han Homonhon in nagtanom hin 500 nga kakahuyan didto han isla nga nagin kaparte han mga buruhaton han dako nga okasyon.
An Misa in ginpangunahan ni Bishop Crispin Varquez ngan sobra 30 nga kapadi-an han Diocese of Borongan. Gintambungan gihapon ini han mga tinaglawas han Espanya ngan iba pa nga opisyales han gobyerno. #
