Isumat.com/9:09AM, Abril 7, 2021
Gintotoohan nga problema ha pamilya an nakagduso hin usa nga drayber hin traysikol ha Cabucgayan, Biliran nga tiwasan an iya kinabuhi.
Dida han report han Cabucgayan PNP Station, ginkilala an biktima nga hi Jimmy Hingoy, 36 anyos, inasaw-an, ngan residente han Brgy Bunga, Cabucgayan.
Dida han inisyal nga imbestigasyon, napa-usa an mga anak han biktima nga pira na ka oras nga waray gagawas han kwarto an ira tatay, sanglit ginpwersa pag-abri an portahan ngan nakit-an nga nabitay an lawas ni Jimmy.
Gintalinguha nga madara ha hospital an biktima pero gindeklarar nga dead on arrival.
Sumala han pamilya han biktima, nag problema hi Hingoy tungod kay waray na umuli ha ira panimalay an iya asawa.
Nagpahayag an mga imbestigador nga waray nira nakita nga foul play dida han panhitabo.
Hadin nag-agi nga semana, tulo nga mga daragita an nagpakamatay ha magkalainlain nga parte han Leyte tungod hin pagbusa-i han kag-anak ngan depression. #
