Nagpagawas hin Executive Order No. 27 hi Mayor Richard Gomez may panuyo han pag-regulate han mga tawo nga masulod han syudad pinaagi han land transportation ngan sarakyan pandagat. Kaparte ini han mga pitad han City Government ha panlimbasog nga deri na magsarang an COVID-19.
Ha ilarum han iya kamanduan, tinikangan alas 6 han gab-i yana nga adlaw, Marso 15, 2020, deri la basta basta nga makakasulod ha Ormoc an mga pasahero o bisan hin-o nga tikang ha gawas han lugar. An puede la makasulod amo an mga residente han Ormoc nga nagtatrabaho o na-eskwela ha iba nga lugar nga mauli ha ira puy-anan, sugad man mga taga Ormoc nga nabalik la ha ira lugar, pero kinahanglan magpakita hin mga dukumento o ID pagpamatuod nga residente hira han syudad.
Puede gihapon makasulod an deri mga residente han Ormoc pero adto nagtatrabaho o may negosyo han nasabi nga syudad, pero kinahanglan gihapon nga magpakita han kaangayan nga mga papeles antis hira pasudlon. Kun may mga emergency cases sugad hin operasyon, dialysis ngan sakit ha kasingkasing, papasudlon gihapon hira, pero kun may mga sintomas an pasyente hin trangkaso, deri na ini tutugutan makasulod ha syudad.
Tutugutan naman nga makadu-ong ha Ormoc Port an mga sakayan pandagat ngan makakasulod an behikulo nga nagdadara han mga supplies ngan pagkaon basta may igpapakita nga dukumento nga para gud ha Ormoc o hagrani nga lugar an delivery han produkto.
An mga Public Utility Vehicles nga may lisensya pag-operate ha Ormoc in magpapadayon an byahe pero ha sulod la han syudad.
An Philippine National Police amo an mangunguna han pag-implementar han travel restrictions ha magkalainlain nga entry points ngan boundaries han syudad.
Magpapadayon naman nga abri para ha publiko an mga tindahan ngan establisemento nga naghahatag hin serbisyo pero kinahanglan igpatuman hin istrikto an social distancing. Padayon gihapon an operasyon han mga internet cafes, sinehan, computer gaming cafes, ngan mga establisemento nga parehas hini an operasyon pero deri puede an mga menor de edad nga makasulod hini nga mga establisemento.
Ha ilarum gihapon han Executive Order, suspendido an klase ha ngatanan nga leves han mga eskwelahan ha Ormoc tikang Marso 16, 2020.
Ini nga mga kamanduan in epektibo tikang alas 6 han gab-i Marso 15 tobtob katutnga han kagab-ihon hiton Marso 31, 2020. #
