Isumat.com/3:43PM,May 19, 2020
Tinikangan dida hiton Biernes, Mayo 22, 2020, bubulkason na an Total Lockdown nga igin-implementar ha Brgy Balao ngan Barangay Hapunan ha Burauen, Leyte. Ini an usa han mga kamanduan ni Burauen Mayor Juanito Renomeron dida han Executive Order nga nagbubutang han iya munisipalidad ha General Community Quarantine tobtob hiton Mayo 31.
Kun aton manunumduman, an duha nga barangay an igin-lockdown dara han duha nga Positive Cases dida han bungto. Didto gud man hini nga mga barangay nag-uukoy an mga nag positibo ug didto gihapon an ira mga close contacts. Pero ha paghagos hin sobra usa ka bulan, naka recover na an duha nga pasyente ngan negatibo gihapon han virus an mga tawo nga ira iginka-urusa. Hinungdan hini an DOH-Regional Office in nagdeklarar nga case closed na an insidente han corona-virus ha Burauen.
Dida han bag-o nga mando ni Renomeron, magtitikang an re-integration o pagbalik han pagkig-urusa ha bug-os nga kumunidad han mga mulopyo tikang ha Balao ngan Hapunan hiton Mayo 22. Pero ha ilarum han mando, deri pa ngatanan han residente an puede makagawas ha ira barangay. Tag-usa la anay katawo kada panimalay an tutugutan pag-gawas labi na an mga nagtatrabaho ngan kinahanglan may-ada quarantine pass ngan health certificate.
Magpapabilin gihapon an monitoring ngan Border Control checkpoints didto han duha nga barangay tobtob hiton Mayo 31, subay han Executive Order No. !7-2020.
An LGU-Burauen an naghatag han ngatanan nga panginahanglan han mga residente han Balao ngan Hapunan samtang iginpa-ilarum hira han lockdown. # (KEVIN SIOSANA)
