Isumat.com/3:49AM,April 28,2020
An bug-os nga munisipalidad han Tarangnan, Samar in aada na yana ha ilarum han Total Lockdown. Ini an nagin desisyon ni Mayor Arnel Tan pira la ka oras an nag-agi katapos igreport han Department of Health nga an gibabag-uhi nga unom nga kaso hin corona virus ha Region 8 in tikang tanan han nasabi nga bungto.
Dida han iya Facebook account, hi Mayor Tan in nagdeklarar nga an Tarangnan in aada na ha Total Lockdown dara hini nga sitwasyon ug an Executive Order kun diiin nahipapatik an mga kamanduan hini nga pitad in iya igpapagawas ha masunod nga mga oras.
Kakulop, an DOH-Regional Office an nagpasamwak han 6 ka tawo nga tikang han bungto nga amo an bag-o nga Confirmed Cases. Dara hini, 9 na ka tawo ha Tarangnan an natapnan hini nga virus, sanglit an DOH in nagsering nga mayda na Community Transmission han kagaw dida han lugar. An syahan nga duha nga pasyente in naka-recover na. An ikatulo in nagpapdayon nga gintatambal ha EVRMC-Magsaysay (Tacloban).
Dida han unom nga bag-o nga pasyente, an lima in adto han Isolation Unit ha Tarangnan Community Hospital, samtang an usa (72 anyos nga babaye) an igbabalhin ha EVRMC tungod han iya edad.
Kasumpay hini, nag post gihapon ha social media hi Tan kun diin duro na an iya panginyupo ha iya nasasakupan nga mulopyo nga deri na gad magkinagawas ha ira mga panimalay. Sering pa niya nga kinakapoy na an mga frontliners han bungto ha pagmonitor han makuri nga sitwasyon.
“Kun madadayon an iyo kamatig-a an ulo, bahala na kamo. We heal as one or we die as one,” pahayag pa han alkalde.
Nanginyupo pa hi Tan ha Makagarahum nga undangon na ini nga krisis.
Dara hini nga panhitabo, magpapadayon an contact tracing dida hini nga bungto basi matudlok an mga tawo nga iginkahibalag han bag-o nga Positive Cases. An DOH in nakatalaan magdara hin Swab Booth ngadto ha Tarangnan basi magin madagmit an pagkuha han mga swab samples nga igpapailarum han confirmatory test.
Han magkaada hin mga nagpositibo nga residente ini nga bungto, an mga barangay la kun diin nag-uukoy an mga natapnan an igin-lockdown, pero yana nga siyam na ka tawo an positibo, nagdesisyon na hi Tan nga bug-os na gud nga bungto an Total Lockdown.
Kun aton manunumduman, kun Total Lockdown an ginpapatuman ha usa nga lugar, ngatanan han residente in deri na puede gumawas ha ira mga balay ug an gobyerno na an maghihimo hin paagi basi katagan an mga mulopyo han ira mga panginahanglan.
An Tarangnan in 4th Class Municipality ngan mayda 41 nga mga barangay. Subay han 2015 Census of Population, 25 mil an mga residente han bungto. An munsipalidad in porlomenos 35 kilometros an kahirayo tikang ha Catbalogan City. #
