Isumat.com/8:01AM, November 16, 2020
Katapos hin pira ka bulan nga waray operasyon, iginbalik na an Torpedo Boat Extreme Ride ha Paranas, Samar.
Dida han Nobyembre 14, hi Samar Governor Michael Tan an nanguna han utro nga arangkada han Extreme Adventure nga pagsakay-sakay hin baluto samtang ginsusulsog an kahilab-an han Ulot River nga amo an gihahalaba-i nga salog ha Eastern Visayas.
Nagsering an gobernador nga kinahanglan na igbalik an sugad hini nga mga aktibidadis ha turismo basi makabulig han hinay-hinay nga pagtindog han ekonomiya nga ginlatigo han Covid-19 pandemic. Damo nga katawhan an nasarig hini nga pakabuhi didto ha Paranas, sanglit dako an mabubulig hini ha mga mulopyo.
Hapagkayana, an local tourists la anay an gintutugutan nga maka-agom han makaruruyag nga adbentyur kun diin igduduyan han agos an mga baluto ngan puede gihapon kumarigos ha presko nga tubig han Deni’s Point ha Ulot River. An mga parokyano in mabayad hin 1,865 pesos (para hin tulo katawo).
An intresado nga mga katawhan hini nga aktibidad in kinahanglan magpa-rehistro anay ha Facebook pinaagi han Torpedo Boat Extreme Ride. An nasabi nga programa han probinsya han Samar in tungod gihapon han pakigsumapayan ha Department of Tourism. #
