Iginkakaparayaw han mga taga Southern Leyte labi na gud an mga taga Maasin City an kapili kan Jane Camus-Knof komo Mrs Model Mom Universe 2020-21.
Dida han impormasyon nga nahikay han Isumat.com, hi Jane an napili han MMU Organization tungod han iya kamahinatagon, mabinuligon ngan kama-anyag. Hiya in malingod ha trono tobtob sunod nga tuig.
Hiya an natawo ha Maasin City ngan didto pagtikang pag-eskwela han elementarya. Bumalhin an iya pamilya ha Cebu ngan didto na niya natapos an elementary. Nakahuman hiya han kurso nga Medical Technology ha Manila. Nagin nurse gihapon hiya ngan cellulite therapist.
An iya mister amo hi John Knof, retirado nga aircraft engineer ngan nag-uukoy hira ha Clearwater, Florida, USA.
Iginpahayag pa han report nga aada ha dugo han pamilya ni Jane an pagigin Beauty Queen kay an iya tiya nga hi Evelyn Camus an nagdaog nga Binibining Pilipinas International hadton 1971 ngan 2nd Runner-up han Miss International Finals. Hi Jane in umapi ngan nagin 2nd Runner-Up han Miss Abu Dhabi hadton 1997.
Damo pa nga pasundayag ha entablado han kama-anyag an gin-apihan ni Jane ngan an iya pirmi plataporma amo an Charity o kamahinatagon, sanglit hiya an gintudlok nga 2019 Mrs Noble Advocacy Queen.
Tikang pa hadto, padayon an pagbulig ha Maasin ngan pirmi napasyada ha Badiang Eelementary School ha Maasin City kun diin nag maestra an iya nanay.
Nagsering an 53-anyos nga hi Jane nga deri gud hiya nag-aalang pagpa-angbit kun ano an mayda ha iya, labi na an pagkaon. Iya pa igindig-on nga kinahanglan bumulig kita ha igkasi tawo bisan deri kita Title-Holder o nagkakapot hin mga posisyon. (with reports from mb.com.ph and sunstar)
