Dara han iya abilidad komo coach ha track and field, duro an kasagipo yana ni Fernando Dagasdas ha pagkapot hin magkalainlain nga mga athletics team ha Cavite ngan Metro Manila.
Hi Dagasdas nga taga Brgy Macopa han Leyte, Leyte amo an Head Coach han mga track and field teams han National University (NU) nga napartisipar ha UAAP ug an Emilio Aguinaldo College nga kaapi han NCAA. Hiya gihapon iton coach ha Dr Jose Rizal School kun diin maestro hiya ha Physical Education, ngan sports consultant han LGU-Dasmarinas City ha Cavite.
Kadam-an na han iya ginkaptan nga mga atleta amo in nagpakakuha ni hin mga medalya ha Palarong Pambansa, Batang Pinoy Games, UAAP, NCAA ngan South East Asian Games. Ha National University aada ha iya pag giya an mga taga Leyte nga mga magmurulay nga hira Decerie Niala, Van Obejas ug an magkaruha nga hira Lealyn ngan Lynlen Sanita.
Antis hiya magin bantuganan nga coach, dako nga sakripisyo ha kinabuhi an iya gin-agi-an. Katapos han iya 2nd year ha Leyte Agro Industrial School igin -upod hi Fernando han iya nanay ngadto ha Cavite kun diin nagtrabaho hiya ha konstraksyon ngan pabrika samtang na-eskwela hiya.
Pira ka beses nga nag pruweba hiya nga magin atleta han eskwelahan pero han 4th year high school na hiya nakagmulay ha discuss ngan javelin throw. Nag-eskwela hiya han kolehiyo ha Cavite State University komo working student ngan nagin miembro han varsity team. Nagmulay hiya han 1998 Bacolod Palarong Pambansa.
Labot la han iya pagigin thrower, nakagmulay gihapon hiya ha decathlon event. Ngan katapos niya pag-eskwela nagtrabaho hiya komo maestro ngan coach ha Dr. Jose Rizal School ha Cavite. Dara han haluag nga iya eksperiensya komo atleta ngan coach, nag abri ini hin oportunidad nga kuhaon hiya han NU ngan EAC.
Hapagkayana, hi Dagasdas in makakagtapos na han iya Doctoral degree. Hiya in nag-uukoy ha Imus, Cavite upod han iya asawa nga hi Mylene nga taga Caibiran, Biliran ug an ira 7-anyos nga anak. # (KEVIN SIOSANA
