Isumat.com/9:15AM, May 30, 2020
Waray makatapon an corona virus tikang han OFW nga taga Hilongos, Leyte ngadto han unom nga mga taga Northern Samar nga iya iginkasakay ha eroplano nga umabot ha Tacloban Airport hadton Mayo 25.
Sumala han impormasyon tikang ha Northern Samar Provincial Office, ginkuhaan hin swab samples an lima nga Nortehanon han DOH Regional Office ngan negatibo an nagin resulta. An ika-unom nga taga Northern Samar in naka-uli na ha iya bungto, pero nag-agi na hiya hin kwarentina ha Manila antis sumakay han eroplano ngan mayda niya certipikasyon nga negatibo hiya han virus.
Ini nga unom ka tawo in kadungan han pagbyahe han OFW nga taga Hilongos nga nag positibo han kagaw.
Labot la ha ira, mayda gihapon 16 pa nga OFWs nga taga Northern Samar an umabot ha ira lalawigan pero iba nga batch. An resulta han ira laboratory test in ginhuhulat pa tobtob yana.
An Provincial Government han Northern Samar in istrikto nga magpapatuman han duha ka semana nga kwarentina para han mga nagkakabalik bisan pa negatibo an ira swab test antis hira umuli.
Ha kabug-usan, mayda na 102 ka tawo an naka-uli ha Northern Samar kun diin 91 an negatibo ug an iba ginhuhulat pa an resulta han testing.
Padayon an panawagan han mga opisyales han lalawigan ha ira nasasakupan nga pirmi gud pagsundon an mga health protocols basi makalikay han sakit ngan deri magpinasarang hin deri tinood nga mga impormasyon mahitungod han Covid-19. # (KEVIN SIOSANA)
