Isumat.com/8:45AM, May 6, 2020
Gin-iistudyuhan na yana han mga opisyales han LGU-Tarangnan, Samar an posibilidad nga magsampa hin kaso kontra han taga Calbayog City nga amo an nakatapon han corona virus ha mga residente han ira munisipalidad.
Ha usa nga interview han media, hi Tarangnan Mayor Arnel Tan in nagsumat nga gin-aadman yana hin hul-os han iya grupo ini nga pitad. Sering pa ni Tan, dako hin duro an baratunon hini nga Calbayognon tungod han distroso nga iya igindurot han bungto.
An 63-anyos nga Calbayognon amo an ikaduha nga Covid Positive Case ha Eastern Visayas. Dida han Marso, pumakadto pa hiya han iya trabaho ha Tarangnan Community Hospital bisan kun mayda niya travel history ha Manila. Ha ilarum han kwarentina nga guidelines, dapat unta deri la anay hiya nag ginawas-gawas ha iya balay hin duha ka semana basi maseguro kun nagdadara hiya han kagaw. Lugod, waray hiya mag kwarentina ngan nag report pa ha trabaho.
Sumala kan Tan, grabe nga pagpasibaya an nahimo hini nga lalaki nga nagdurot hin makarimadima nga perwisyo ha Tarangnan. Dara hini, ginkokonsiderar nira yana nga magsalawad han kaangayan nga kaso. Siyam na katawo an natapnan han virus dida han bungto ug naka lockdown an munisipalidad. Usa nga taga Catbalogan an natapnan gihapon kay nagtatrabaho man hiya ha Tarangnan.
Han una nga semana, nagkaada hin impormasyon nga naghimo hin petisyon an mga bungtuhanon nga deri na pabalikon ha Tarangnan ini nga lalaki.
An mga residente han bungto in nag-aantos yana hin paghimakuri ngan deskriminasyon dara han community transmission han kagaw ha ira lugar. Bisan ngani an kwarta nga tikang ha ira in deri na ginkakarawat han iba nga tawo dara han kabaraka nga matapnan han sakit.
Hi Mayor Tan in pira na ka beses nga nanginyupo hin ayuda para han ira bungto ngan pag-intindi han ira kahimtang.
Sobra na 400 ka tawo an ginkuhaan hin swab samples ha Tarangan basi igpailarum han confirmatory test. Lakip denhi an mga iginka-urusa han naha-una nga mga nagpositibo sugad man mga opisyales ngan frontliners han bungto.
Ini nga taga Calbayog in pira na ka semana nga naka-recover han virus ngan nakabalik na ha iya lugar tikang ha hospital.#
