Isumat.com/Abril 5, 2021
Magpapasunod hin ginpahuruhugot nga patakaran an Tacloban City ha atubangan han nagtitikahitaas nga peligro han paglarab han Covid-19 dida han syudad sugad han natatabo yana ha Metro Manila.
Hi Mayor Alfred Romualdez in nagpatawag hin miting upod an mga miembro han kanan Tacloban Inter-Agency Task Force basi pagsarabutan kun ano nga mga pitad an angay himoon basi kabalabgan an pagsibrang han ginkakahdlukan nga kagaw.
Nagsering hi Romualdez nga tikang yana, an ngatanan nga residente han Tacloban nga tikang ha Metro Manila ug han iba nga lugar nga harani ha Manila in kinahanglan magpakita hin negatibo nga resulta hin RT-PCR o Anti-Gen Test. Ini in kinahanglan igpadara pinaagi han website nga baliktacloban.gov.ph basi ma-aprobaran an ira pagbalik ha Tacloban.
Kun deri akos pagbayad han swab test, kinahanglan magpasabot gihapon basi pag-abot pala ha Tacloban, igpapa-ilarum hin swab test an mauli ug an gobyerno han syudad an magbabayad.
Ginmando gihapon han alkalde nga kun mayda man mga Taclobanon nga nag-aantos hin sintomas han Covid, kadagmitan nga magpa-check-up basi masabtan dayon ngan matagan han kaangayan nga aksyon.
Gin-aghat han alkalde an ngatanan nga magin mabinantayanon ngan magreport kun mayda nagkabalik tikang ha Metro Manila basi mamonitor an ira panlawas.
Gintagan hin doon han alkalde nga deri akos han syudad nga mag-implemerntar hin lockdown tungod kay grabe an epekto hini ha ekonomiya. Pero kun deri magkaka-urusa an ngatanan ngan magtikahitaas an mga kaso han Covid ha Tacloban, mapipiritan hiya pag lockdown.
Nagpabati hi Romualdez hin pagkabaraka kay an iba nga parte han Visayas sugad han Iloilo ngan Bacolod in tigda nga naghitaas an kaso ug gintotoohan nga nadara an kagaw han mga nagbiyahe tikang ha Manila.
Labi na nga makahurulop an sitwasyon ha Tacloban kay an syudad an entry point han kadam-an nga nauli ha Eastern Visayas tikang ha Metro Manila.
An City Government in nakatalaan magpalusad hin Executive Order basi igtaltag an iba pa nga detalye kasumpay han ginpa-istrikto nga mga aludayday ngan rekesitos han magkakasulod nga biyahedor ha Tacloban. #
