Isumat.com/5:43AM, December 11, 2020
Mayda gin-aabat nga “mild symptoms” pero maupay an kahimtang han panlawas ni Mayor Alfred Romualdez han Tacloban City.
Ini an iginhatag nga ladawan ni City Health Officer Dr. Gloria Fabrigas han sitwasyon yana ni Romualdez han magpositibo ini han Covid-19. Kakulop, Disyembre 10, gumawas an resulta han swab test han alkalde ngan kumpirmado nga natapnan hiya han kagaw, pahayag ni Fabrigas.
Hi Romualdez in naka-isolate na yana ngan nagdudumara naman hin contact tracing an mga health personnel basi matudlok an katawhan nga iya iginka-urusa hadin nag-agi nga pira ka adlaw.
Sumala pa kan Fabrigas,l nagtikang paglutaw an mga sintomas han sakit hadton Disyembre 2 ngan ginkuhaan hin swab sample hi Romualdez. Nahisumat naman nga negatibo han virus an iya anak nga hi Sophia.
Antis kan Romualdez, hira Mayor Dexter Uy han Catbalogan, Manuel Aofang han Palapag ngan Gilbert Go han Giporlos an mga alkalde ha Rehiyon Otso nga natapnan han kagaw. Hi Aofang in namataty tungod han komplikasyon, samtang nagpaka recover naman hira Uy ngan Go.
Tobtob han Disyembre 10, an Tacloban City in nagkaada na hin 1,107 Total Cases, 1,035 Recoveries ngan 17 nga pasyente an namatay. Hapagkayana, mayda 77 nga Active Cases an syudad. #
