Deri tinood nga mag-i-implementar hin total lockdown an gobyerno ha syudad han Tacloban. Ini an igindig-on ni Mayor Alfred Romualdez komo pagklaro han mga notisya nga nagkagawas kanina han aga dara han nakumpirmar nga kaso han COVID-19 ha Burauen, Leyte.
Sumala kan Romualdez, waray kamatuoran ngan fake news an mga hurobhurob ngan mga post ha social media nga magde-deklarar hiya hin total lockdown. An amay han syudad in nagsering nga imposible nga igpatuman ini nga pitad kay kun amo ini an sitwasyon, ngatanan han residente in deri makakagi-os ngan waray makakagawas han balay. Ha ilarum han total lockdown, an gobyerno in mahugot nga magbabantay ngan dadakpon an bisan hin-o nga magawas ngan an gobyerno liwat an maghahatag han pagkaon ngan iba pa nga kinahanglan han mga mulopyo.
Pero nagsering hi Romauldez nga duro na ka istrikto an pagpatuman han Enhanced Community Quarantine labi na an pag gamit han quarantine pass nga dapat kanan usa gud la ka tawo ha kada pamilya. Papahugtan gihapon an pagbantay ha mga exit ngan entry points han syudad ug deri gud makakasulod an deri importante an toyo. An makakasulod ngan makakagawas han Tacloban amo an mga frontliners nala, labot la kun may mga emergency cases nga kinahanglan dad-on ha hospital.
Iginpapadakop gihapon niya an bisan hin-o nga waray face mask o deri asya an paggamit han face mask nga aadi ha gawas han balay. Bisan an mga nagsisigarilyo ha pampubliko nga lugar iginpapa-aresto gihapon niya.
Nanawagan gihapon an alkalde ha DOH nga sumatan dayon an natutungdan nga LGU kun mayda ginkuhaan hin sample basi mamonitor na an pasyente samtang naghuhulat han resulta.
Hi Romualdez in nagpahayag gihapon nga kinahanglan arestuhon an mga PUI nga nagawas han ira balay kay supak ini han balaud. Iginbuyagyag niya nga na-alarma hiya han bag-o nga kaso han corona virus ha Burauen nga an distansya in sobra la hin 40 kilometros tikang ha Tacloban.
Magpapadayon naman an pagsulod han mga produkto nga kinahanglan han katawhan sugad han pagkaon ngan abri an mga establisemento nga nagbabaligya han essential items. #
(Posted 5:19 PM, April 17, 2020)
