Isumat.com/8:03AM, Marso 25, 2021
Kinahanglan magin alerto ngan magin andam han posibilidad nga “spill over” han Covid ha Metro Manila nga posible maka-apekto ha Tacloban.
Hi Mayor Alfred Romualdez in nagpahimatngon nga deri magpasibaya han pag-ikmat ngan paghirot kay posible sumaka na liwat an mga positibo han Covid ha aton dapit kun madara an kagaw han katawhan tikang ha Manila nga mapakanhi ha aton.
Hadin nag-agi nga pira ka adlaw, nakapatik hin duro ka hitaas hin ihap nga bag-o nga nagkatatapnan han virus an Metro Manila ngan ginkakabarak-an nga malabyog ini ha mga probinsya kun may katawhan nga makagdara hini ha iba nga lugar.
Pira na ka semana an nakalabay nga deri na damo an nagkakatatapnan ha Tacloban ngan Eastern Visayas, pero ini nga sitwasyon yana in gintatarhog han tigda nga pagsikad han numero ha Metro Manila ngan Calabarzon Area.
Nagsering hi Romualdez nga dako an posibilidad nga matabo ini kay an Tacloban amo an panguna nga “gate-way” han mga biyahedor tikang ha Manila. Igindugang pa han alkalde kinahanglan magin istrikto an pagmonitor han mga nagkaka-abot labi na yana nga posible damo an manguli tungod han Semana Santa.
Dara hini, nagpahinumdom na liwat an alkalde ha mga Taclobanon nga deri gud hikalimtan an pagsunod han minimum health standards sugad han pagsul-ot han face mask ngan face shield, deri pagtambong hin katitirok, pagmentenar han social distancing ngan kamalimpyo ha panlawas.
Tobtob han Marso 24, umabot na ha 2,112 an natapnan ha Tacloban kun diin 1,984 an naka-recover ngan 53 an tumalikod ha kadayunan, ngan mayda 75 an Active Cases. #
