Isumat.com/Hulyo 8, 2022
Katapos hin usa ka adlaw nga paghalpat han mga otoridad, na-aresto na an suspetsado han pagpatay hin usa nga kapitan hin barangay ha Biliran, Biliran.
Kakulop, Hulyo 7, 2022 nasikop han kapulisan hi Jene Balce didto ha Brgy Cavite East, Palo, Leyte. Hi Balce an gintutudlok nga nagbuno ngan nakamatay kan Roberto Yapan, kapitan han Brgy Julita, Biliran, Biliran. Natabo an insidente hadton gab-i han Hulyo 6, 2022.
Sumala han mga imbestigador, aminado hi Balce nga hiya an nagbuhat han krimen ngan sasampaan hin kaso nga murder an suspetsado.
Ha interview han Biliran Island News, nagsumat hi Balce nga personal nga kasinahon an nagduso ha iya nga mabuhat an krimen. Ha nag-agi nga pira ka semana, tulo ka beses nga nagkabalingkutay an duha nga personalidad ngan nagsesering pirmi an kapitan ngadto kan Balce nga “Bayad na ang buhay mo.”
Nag-asoy pa an suspetsado nga posible pulitika an rason han deri nira pagka-asya ni kapitan kay magka-iba nga kandidato an ira tagsatagsa nga ginsuportaran dida han nag-agi nga eleksyon.
Nagpabati hin pagbasol han iya nabuhat ngan nangaro hin pasaylo an suspetsado ha pamilya han biktima durante han nasabi nga pakighimangraw han media ha iya. #
