Isumat.com/ Mayo 16, 2023
Namatay an usa nga drug personality ngan nakakumpiskar hin dako nga kantidad hin iligal nga droga an mga otoridad ha gindumara nga buy-bust operation ha Brgy Tambulilid, Ormoc City, ala 1:40 han maagahon, Mayo 15, 2023.
Ginkilala an namatay nga suspetsado nga hi Allan Bulahan, gintutudlok nga High Value Individual ha Drugs Watchlist.
An operasyon in ginhimo han gin-urusa nga mga pwersa han PNP Regional Drug Enforcement Unit, Ormoc City Police ngan Ormoc City Mobile Force Company.
Dida han operasyon, an poseur-buyer nga pulis in nakapalit hin upat ka sachet hin gin-aalegar shabu tikang kan Bulahan kantidad hin 100 Mil pesos.
Katapos han ira transaksyon, naka-abat an suspetsado nga dada-upon na hiya han grupo han mga otoridad, sanglit iya ginbunlot an iya pusil ngan nagpabuto ha kapulisan. Bumulos pagpusil an mga operatiba ngan naigo ha magkalainlain nga parte han iya lawas an gintatahapan.
Kadagmitan gindara ha Ormoc District Hospital an suspek pero gindeklarar nga dead on arrival.
Dida han panginano han mga imbestigador ha lugar han insidente, hira in nakakuha hin 21 ka sachet hin gintotoohan shabu, ziplock bag nga may sulod hin gin-aalegar shabu, usa nga pistola ngan bala ngan iba pa nga drug paraphernalia.
Naghimo gihapon hin pagkapkap ha suspek an mga kapulisan didto ha hospital ngan nakakuha pa hin kadugangan nga pito ka sachet hin gin-aalegar nga droga.
Ha kabug-usan, an narekupo nga droga in may kabug-utan nga 1.5 kilogramos ngan balor hin 10.2 Milyones pesos.
Gindayaw naman ni PNP Regional Director BGen Vicent Calanoga an kapulisan ha malinangpuson nga operasyon. Sumala kan Calanoga, tungod hini, nabalabgan nga magsarang ngan gamiton an droga ha mga kumunidad nga dako an magigin distroso ha kabubwason han mga batan-on ngan kamurayaw han publiko. #
