Isumat.com/6:25AM, Pebrero 8, 2021
Naghikog ha sulod mismo han selda an suspetsado pagpatay han iya misis ngan pakabuno hin tulo pa nga iba didto ha San Jorge, Samar.
Dida han report tikang ha San Jorge PNP, an nagpakamatay in ginkilala nga hi Liberato Cabubas, 51 anyos nga naatubang hin mga kaso nga murder ngan frustrated homicide tungod han iya nahimo nga krimen hadton Enero 29, 2021.
Sumala han mga imbestigador, hi Cabubas in natad-an nga nabitay an lawas ha banyo han iya selda kun diin higot han iya shortpants an iya gingamit paghikog. Nanalinguha pa an kapulisan nga masalbar an biktima ngan gindara ha hospital pero gindeklarar hiya nga dead on arrival.
Hi Cabubas an suspetsado pagpatay han iya misis nga hi Jenelyn ngan pakabuno hin tulo pa nga iba. Hadto nga adlaw, hubog an suspetsado ngan iya ginbuno ha dughan an iya asawa.
Kataliwan hini, gumawas hiya ha balay ngan iya ginbuno an iya iginkatapo ha kalsada nga tulo ka tawo ginlalakipan hin duha nga DepEd teachers. #
