Isumat.com/7:40AM, July 03, 2020
Bastante an suplay han bugas ha aton dapit tobtob han katapos hini nga tuig. Ini an iginpatapod ni Frederick Dee, an pangulo han Grains Retailer Confederation (GRECON) han rehiyon.
Ha usa nga pakighimangraw han local media, hi Dee in nagsumat nga bastante an bugas ha mga merkado ngan nagmenos pa ngani an presyo hin haros dos pesos an kada kilo.
Ini in dara kay an mga Local Government Units in waray na magpakyaw hin damo nga bugas basi ipanhatag tungod han lockdown. Bumalik naman gud ha pagpakabuhi an mga mulopyo salit pipira-pira nala nga an LGU nga nakompra hin bugas.
Ginklaro niya nga hanhadi naka-eksperinsya hin artipisyal nga pagkulang hin bugas kay nagpasig-unahay an mga LGU pagpalit hin binulto-bulto ka sako hin bugas para han ayuda durante han lockdown.
Ini in labot la nga damo an suplay tikang han mga rice producer ha probinsya han Leyte sugad man waray hunong an pag-abot han imported nga bugas tikang ha Vietnam.
Igindugang pa ni Dee nga an suplay yana in tobtob Setyembre ngan deri angay kabarak-an kay dida hito nga bulan, kat-ani na liwat hin bugas. Dara hini, segurado hi Dee nga yana nga 2020, hamurasak an bugas ha mga merkado ha Eastern Visayas. #
