Isumat.com/Marso 23, 2022
Bisan ha takna hin pagbulig para han mga kablas nga baryuhanon, waray la gihapon mag-alang an mga rebelde nga terorista nga NPA pag-atake han kasundaluhan nga kaapi han Community Support Program (CSP) ha Catubig, Northern Samar.
Tungod hini nga pa-traydor nga pitad han mga rebelde, usa nga kaapi han Philippine Army an nag-antos hin igo hin bala ha too nga tiil dida han insidente nga natabo pasado alas 10 han aga, Marso 22, 2022 ha Brgy Nagoocan han nasabi nga bungto.
Dida han report han 20th Infantry Battalion, ginkilala an nasamad nga hi PFC Gilbert Gabin nga kadagmitan nadara ha Northern Samar Provincial Hospital pinaagi han Black Hawk Helicopter han pwersa armada.
An mga tropa han gobyerno in didto han mao nga barangay komo pagbulig han implementasyon han mga proyekto ha ilarum han CSP. An Nagoocan in usa han mga barangay ha Northern Samar nga natagan hin 20 Milyones Pesos balor hin mga proyekto pinaagi han Support to Barangay Development Program.
An mga kasundaluhan an naghimo hin paningkamot ha pakigbinuligay han mga lokal nga lideres ngan residente basi mawara an impluwensya han mga rebelde dida hini nga mga lugar. Tungod hini, gin-aprobaran ini nga pondo basi mapa-uswag an mga barangay ngan dayuday na nga deri mahibalik an impluwensya han mga NPA.
Ini nga panhitabo in mahugot nga ginkondenar ni Fe Baldoza, an kapitana han mao nga barangay. Sumala ha iya, duro kamaraot ini nga binuhatan han NPA kay labot la nga makakatagamtam an barangay hin kaupayan pinaagi han mga proyekto, waray pa gud mag-alang an mga rebelde hin pagsulong bisan kun damo an mga sibilyan dida han lugar.
Pahayag naman han Philippine Army, an mga NPA in padayon an pagtalapas han International Humanitarian Law. Kun manunumduman, hadton Pebrero 8, 2022, an mga NPA in nagratrat hin bala ha Brgy Roxas, Catubig kun diin duha nga sibilyan an binawi-an hin kinabuhi.
Hadton Marso 5, 2022, hi Sgt Amado in nasamad gihapon han sumulong an mga rebelde ha Brgy CM Recto bisan kun may mga sibilyan, dugang pa han militar. #
