Isumat.com/8:17AM, June 3, 2020
Iginmando han Municipal Task Force on COVID-19 han Burauen, Leyte nga ig-implementar an Modified Lockdown ha usa nga subdivision dida han bungto kun diin nag-uukoy an bag-o nga nagpositibo han virus nga lalaki.
Dida han opisyal nga pahayag han Task Force nga pinamumunu-an ni Mayor Juanito Renomeron, ira ginpatuman an lockdown basi kalikyan an pagsarang han kagaw ha ira lugar. Kakulop han aga, igin-anunsyo han DOH an ikatulo nga kaso han COVID ha Burauen nga amo ini nga 43-anyos nga lalaki.
An subdivision in namumutang ha Poblacion Brgy District 7. Ini nga lalaki in iginbalhin na ha Burauen District Hospital Isolation Unit upod an iya asawa, duha nga anak ngan umangkon. Gindudumara gihapon han Task Force an contact tracing basi matudlok an iba pa nga iginka-urusa han pasyente labot la han iya pamilya.
Sumala pa han pahayag, hadton Mayo 25, ini nga lalaki, upod an iya asawa in pumakadto ha Divine Word Hospital basi ighatod an ira umangkon nga may sakit basi igpa-confine ha hospital. An Hospital in mayda patakaran nga kinahanglan igpailaruum ha Rapid Test an pasyente ug an magbabantay. Ha ira nga tulo, ini nga lalaki an nag positibo han Rapid Test.
Kadagmitan nga ginsumatan han hospital an LGU-Burauen hini nga panhitabo, sanglit hadton maagahon han Mayo 26, ginkuha han LGU ini nga lalaki tikang ha Divine Word Hospital. Samtang nagbibyahe hira tipakadto ha Burauen, namatay didto ha DWH an umangkon hini nga lalaki ug an rason han kamatay in bacterial meningitis.
An lalaki in iginkwarentina ha iya balay ug iginbalhin pa ngani ha ira farmhouse ha Brgy San Jose West basi mahibulag hiya ha publiko, ngan dida han Mayo 29, ginkuhaan hiya hin swab sample para han laboratory test ug kakulop iginpasamwak han DOH nga positibo hiya han virus.
Hinsabutan pa nga ini nga pasyente in mayda hypertension ngan duha na ka beses nga nag-antos hin mild stroke hadton 2017 ngan 2018.
Hi Mayor Renomeron in nanawagan ha iya nasasakupan nga bubuhaton han LGU an ngatanan basi kalikyan an paglarab han kagaw ngan iya gin-aaro an suporta ngan kooperasyon han mga bungtuhanon.
An DOH ug an LGU in mahugot yana an pag-istudyo kun hin-o ngan diin nga lugar katapni han virus ini nga lalaki nga gintudlok nga EV Patient # 41.
An duha nga naha-una nga kaso ha Burauen, hira Patient 5 ngan 7 an igindeklarar na han DOH nga tim-os nga nakatalwas han sakit ngan puede na igka-urusa han publiko. # (KEVIN SIOSANA)
