Isumat.com/8:43AM, June 12, 2020
Sakay hin mga barko tikang ha Cebu ngan eroplano tikang ha Manila, nagka-abot kaulop in sobra 300 katawo nganhi ha Region 8.
Kakulop antis mag ala 1 han kulop, tumugpa an gisasyahani nga commercial flight han Philippine Air Lines ha Tacloban Airport tikang igpatuman an lockdown, kun diin sakay denhi in 178 nga mga pasahero. Ginlalakipan ini hin mga na-stranded ha Manila, mga OFWs, ngan mga tawo nga otorisado pagbyahe an luran han nasabi nga eroplano.
Hira in nakigsumpayan ha ira tagsatagsa nga LGUs basi mamonitor an ira pag-abot sugad man an ira pag-kwarentina ha ira mga lugar.
An PAL in magkaka-ada na hin tag-usa nga flight kada adlaw, samtang dida hiton Hunyo 16 nahireport nga mabyahe na gihapon tikanhi ha Tacloban an commercial flights han Cebu Pacific ngan Air Asia.
Didto naman ha Ormoc, tulo nga barko an dumu-ong kakulop ngan nakabalik na ha Region 8 an sobra usa ka gatos nga mga pasahero tikang ha Cebu. Hira in na-abtan han lockdown ha Cebu ngan yana la naka-tsansa nga makabalik.
Ginsundo hira han mga behikulo han ira mga LGU ngan ginsunod an mga guidelines para han nagkakabalik nga mga residente.
Hadin Mierkules han kulop, mayda gihapon pira nga residente han Region 8 an iginhatod han barko han BFAR nga dumu-ong ha Catbalogan City, Samar. # (KEVIN SIOSANA)
