Isumat.com/9:27AM, Pebrero 6, 2021
Ginpakurukusog pa han Philippine National Police an pwersa kontra han insurhensiya ngan kriminalidad ha Sinirangan Bisayas pinaagi han pag-deploy hin kadugangan nga tropa tikang han Special Action Force (SAF).
Ha kamanduan ni PNP Chief Gen Debold Sinas, igpapasarang ha magkalainlain nga parte han rehiyon an 226 nga SAF Commandos basi madugangan an kusog han kapulisan ha pagsupil han magraot nga elemento.
Sumala han report han PNP Regional Office, an sobra dos syentos nga SAF Members in bag-o pala pag-gradwar tikang han unom ka bulan nga mahugot nga pagba-id han ira kapas, amo ini an SAF Commando Course. Ini nga mga Commandos in nagpailarum han ira training ha Calbayog City.
Hira in igdedestino ha mga parte han Rehiyon Otso kun diin gindudumara yana an mga operasyon kontra han kumunista nga New Peoples Army. Maghahatag gihapon hira hin suporta ha mga Police Stations ha pagsurapo han kriminalidad, pahayag pa ni Sinas.
Hi Sinas in nagtambong hadin nakalabay nga adlaw han seremonyas han gradwasyon han Batch 107 ngan 108 han SAF Commandos. Dida han iya mensahe, iya ginmanduan an pwersa nga an ira syahan nga assignment in denhi ha Eastern Visayas. #
