Isumat.com/2:40PM, May 29, 2020
Tobtob kakulop nga adlaw, Mayo 28, inabot na ha 111 katawo an naka-uli ha Tacloban City tikang ha Manila ug ha iba nga nasud. Ginkokomponer ini hin mga OFWs sugad man mga Taclobanon nga na-abtan han lockdown ha iba nga lugar.
Subay han ginkasarabutan han Balik-Tacloban nga programa, hira ngatanan in igpapa-ilarum hin duha ka semana nga kwarentina. Dida hini nga nagka-abot 106 an aada ha Home Quarantine samtang lima la an aadto yana ha Quarantine Facilties han syudad.
Dara hini, damo nga mga katawhan an nababaraka han peligro nga puede bumutho dida han damo hin duro nga aadto la han ira kalugaringon nga panimalay nag kwarentina. Sumala pa han mga iginkahimangraw han Isumat.com, dako yana nga paki-ana kun masusunod ba han mga ka-urusa ha balay an mga aludayday nga ginlatag han City Health Office. Usa gihapon nga paki-ana kun waray ba magpipinasaway hini nga mga naka Home Quarantine.
An City Health Office in nagtugot para han Home Quarantine basta makakapatapod an mga sulod-balay ug an nakabalik nga tawo nga makakasunod han health protocols. Usa gihapon han rekisitos an pagkaada hin kalugaringon nga Isolation Area didto han balay. An mga barangay officials ngan health workers in ginmanduan gihapon nga igmonitor hin mahugot ini nga mga tawo.
Ha iba nga munisipalidad ngan syudad, deri anay pababalikon ha ira balay an mga magkaka-uli ngan didto an kwarentina ha mga Isolation Facilities han LGUs ha sakob hin duha ka semana. Pero denhi ha Tacloban, gintugutan ini nga Home Quarantine han City Government.
Dida han mga nagkabalik tikang ha iba nga lugar, tulo na ka tawo an nag positibo han corona virus ug ini amo an taga Baybay City, Tanauan, ngan Hilongos. Tikang han ira pag-abot han una nga semana, iginderetso ini hira ha Isolation Units ngan waray pa igka-urusa han ira tagsatagsa nga pamilya. # (KEVIN SIOSANA)
