Isumat.com/Agosto 26, 2021
Katapos hin sobra usa ka tuig nga paghalpat han mga otoridad, na-aresto na in usa nga Sangguniang Kabataan Chairman ha Biliran nga naatubang hin kaso nga rape.
Dida han impormasyon tikang ha Biliran PNP Office, an nadakop nga akusado in ginkilala nga hi Edwin Arisgado, 25 anyos, waray asawa, SK Chairman ngan residente han Brgy Langgao, Cabucgayan, Biliran. Nadakop hi Arisgado han kapulisan pasado alas 11 han aga, Agosto 24, ha Brgy San Roque, Biliran, Biliran.
Ha record han husgado, hi Ariegado in ginsampaan hin kaso nga panlugos han babaye nga biktima hadton 2019. Ginpalamadyaan daw an iya pagkababaye han SK Chairman hadton Hulyo 10, 2019 han sudlon hiya ngadto han iya kwarto kun diin natabo an panlugos.
Hadton Enero 15, 2020, hi Judge Constantino Esber han RTC-Branch 37 in nagpalusad han Warrant of Arrest kontra kan Arisgado. Waray gihapon piyansa nga iginrekomandar an korte.
Hi Arisgado nga gintudlok komo Numnber 4 Most Wanter Person han probinsya in gindara ha Cabucgayan PNP kun diin hiya igpapaslak samtang ginhihimo an pagbista han iya kaso. #
