Magkakapot hin dako nga responsibilidad an Singbahan Katoliko ha pagkab-ot han kamurayawan denhi ha Sinirangan Visayas.
Ini in kahuman la karawaton han tulo nga obispo ha isla han Samar an pag-ayat nga bumulig hira han localized peace talks ha butnga han gobyerno ngan rebelde nga New Peoples Army.
An nasabi nga mga lideres han singbahan amo hira Catarman, Northern Samar Bishop Emmanuel Trance, Borongan Bishop Crispin Varquez ngan Calbayog Bishop Isabelo Abarquez.
An tulo nga mga obispo in nagtambong han gindumara nga hiruhimangraw han mga kaapi han Samar Island Partnership for Peace and Development (SIPPAD).
Durante han meeting, ginkasarabutan nga hira Abarquez, Trance ngan Varquez in mangungundahan ha mga inisyatibo basi magma binungahon an localized peace talks. Iginpatapod gihapon han mga Local Chief Executives ha panguna ni Regional Peace and Order Council Chairman ngan Eastern Samar Governor Ben Evardone an ira hul–os nga panlimbasog para hini nga panuyu-anan.
Kasumpay hini, nanawagan naman an mga obispo nga magin tinood iton gobyerno ha pagpoypoy han korapsyon kay ini in nakaka pa grabe han kapobrehan. Ha atubangan hini, gin -angkon gihapon nira nga an kapobrehan an usa han mga rason kun kay-ano nagpapadayon an insureksyon.
An localized peace talks in kaparte han “whole nation approach” nga estratehiya han gobyerno nga may tinguha nga matapos na an sobra lima ka dekada nga rebelyon denhi ha Pilipinas. #
