Tinikangan yana nga adlaw Martes, Marso 17, 2020, waray la anay celebrasyon han Santos nga Misa nga tatambungan han katawhan ha ngatanan nga mga Parokya ngan Mission Stations nga nasasakop han Vicariate of Tacloban.
Ini an nagin sentro han ginpagawas nga Pastoral Decision han Arsobispo han Palo John Du, DD. Hi Arsobispo Du an nagdesisyon hini komo suporta han mga pitad han Tacloban City Government kontra han COVID-19, ngan gin-abuyunan ini han mga kapadi-an han Vicariate. Sanglit, waray la anay Santos nga Misa nga pam publiko tikang yana tobtob nga makagdesisyon na kun san-o magigin talwas an katawhan.
An Santo Nino Parish in magdudumara la gihapon han Misa kada alas 6 han aga ngan alas 6 han gab-i pero dapat waray maniringba. Ini nga mga Misa in makikita ha live-streaming han social media account han parokya. Kasumpay hini, ginlalauman gihapon an iba nga parokya nga magdumara han misa pero waray la matambong, pero kinahanglan maningkamot an parokya nga makit-an ini ha live-streaming.
An mga Misa ha mga lamay, misa para han iglulubong, ngan bunyag in puede la gihapon himoon, pero an mga apiki la nga miembro han pamilya an matambong kun diin igpapatuman an social distancing durante han liturhiya.
Ginsasagdunan naman an may plano pagpakasal ha singbahan ha masunod nga duha ngada hin tulo ka bulan nga ig-ugsod ini ha iba nga petsa.
Bisan kun waray na public celebration han Misa, magpapabilin naman nga abri an mga Singbahan para han publiko nga karuyag mag-ampo.
Kasumpay hini, gin-aawhag han Arsobispo an tagsa tagsa nga pamilya nga magpartisipar han social media live streaming nga Misa ngan karawaton an Makagarahom pinaagi han Spiritual Communion. Upod gihapon denhi an pangadi han Santos nga Rosario ngan Oratio Imperata kada alas 6 han gab-i ngan ipadayon an panginyupo ha Ginoo nga matapos na ini nga krisis ha panlawas#
