Isumat.com/7:57AM, December 20, 2020
Namatay in retirado nga pulis ngan anay empleyado ha magkalain nga insidente hin panmusil ha Maasin City ngan Calbayog City hadin nag-agi nga mga adlaw.
Hadton Disyembre 12, pasado alas 7 han aga, ginpanmumusil ngan pinatay hi Dominico Petere, may igo nga pangedaron ngan retirado nga pulis. Subay han inisyal nga imbestigasyon, hi Petere in natukdaw ha natad han iya balay ha Brgy Dongon han tigda la may umagi nga busag nga SUV ug nagpaarak hin bala an sakay hini ngadto han biktima. Nagsering pa an report nga waray plate number an sarakyan han mga suspetsado nga kadagmitan nagpaharorot katapos han krimen.
Padayon an imbestigasyon han Maasin City PNP hini nga panhitabo.
Didto naman ha Calbayog City, an anay empleyado han City Environment Office nga hi Pancho Doren an namatay han pusilon hin waray hikilal-i nga suspetsado ha Brgy Carmen hadton Disyembre 13.
Hi Doren upod an iya misis in nagbabaktas tiuli ha ira balay han daupon han suspetsado ngan pusilon. Naigo ha ulo an biktima nga amo an hinungdan han iya kamatay.
Waray pa katutudlok han mga otoridad an nagpapaluyo ngan motibo han krimen.
Hito liwat nga adlaw, pinusil ngan namatay an mag-uuma nga hi Paquito Fuenteblanca ha Brgy Majumadac, Calbayog. Upat nga suspetsado an nagpusil han biktima ug nagpaka-eskapo hira.
Gin-iimbestigar pa gihapon ini nga panhitabo han mga tinubyanan han balaud. #
