Isumat.com/7:43AM, Enero 4, 2021
Nagpapadayon an imbestigasyon han mga otoridad ha Marabut, Samar mahitungod han panmusil nga natabo hadin Enero 3 kun diin usa nga lalaki an namatay.
Subay han record han Marabut PNP, an biktima nga hi Dionesio Padel, 58 anyos ngan residente han Brgy Tinabanan, in nagmamaneho han iya motorsiklo alas 7 han aga basi tumambong han misa ha Brgy Osmena. Tigda la nga umulpot an mga suspetsado ngan ginpanmumusil hi Padel.
Naigo ha ulo ngan butkon an biktima nga nagin hinungdan han iya kamatay. Kadagmitan naman nga nanngalagiw ha waray pa hisabuti nga lugar an mga suspetsado.
Ha iba naman nga panhitabo, gintotoohan nga dara han impluwensya hin makahurubog nga irimnon an rason han ka-aksidente hin tulo nga kalalakin-an samtang sakay hin motorsiklo ha Laoang, Northern Samar hadton Enero 2.
Nagpapakita an inisyal nga imbestigasyon nga an mga biktima nga hira Erwin Lagrimas, Jefrey Morillo ngan Jerry Ynota in nagmomotor pasado alas 4 han kulop ha Brgy Burabod han sumemplang hira.
Nag-antos hin mga bun-og ngan kasamdan ha lawas an tulo ngan gindara ha hospital. Nag-asoy an mga testigos nga an mga biktima in nagpaka-inom hadto nga takna. #
