Isumat.com/4:29AM, August 19, 2020
Naatubang hin kaso nga panlugos an 49-anyos nga security guard nga gin-aalegar nagpalamadya han pagkababaye hin usa nga Locally Stranded Individual didto mismo ha sulod han Quarantine Facility ha Sito Cayangian, Brgy Tinghub, Villaba, Leyte.
Ini in katapos la igmando kakulop ni Mayor Jorge Veloso ha Villaba PNP nga pasakaan dayon hin kaso an suspetsado nga hi Ronie Condes nga gin-akusaran hin duha ka beses nga paglugos han biktima.
An 44-anyos nga babaye in pira pala ka adlaw nga nag-iistar didto han Quarantine Unit tikang maka-uli hiya tikang ha Cebu. Nagsaysay an biktima nga dida han gab-i han Agosto 15 an syahan nga paglugos ha iya ngan sinundan pa ini han maagahon hadin Agosto 17. Dida hini nga mga insidente, gintutukan hin pusil an biktima ngan gintarhog nga papatayon sanglit waray niya nahimo han maraot nga plano han suspetsado.
Pero dida han udto han Agosto 17, nakahimo an biktima hin pagpadangat hin impormasyon ngadto han LGU kasumpay han natabo ha iya. Kadagmitan nga naghimo hin pitad an LGU ha panguna ni Mayor Veloso ngan gin-aresto hi Condes. Dida han pagka-atbang han biktima ngan suspetsado ha presinto, gintudlok han LSI hi Condes nga amo an naglugos ha iya ngan desidido hiya nga sampaan hin kaso an sekyu.
Hi Veloso in nagmando liwat nga tanggalon na komo Job Order Employee han LGU an suspetsado.
Nagpabati hin duro nga kabido hi Veloso dara han pagtraydor ni Condes han iya iginhatag nga pagtapod komo bantay han Quarantine Facility. Sumala han alkalde, nagkumpiyansa hiya kan Condes kay bootan man ini han ira pag-istorya.
Iya gintapuran hi Condes nga magin bantay han facilidad kay an balay han suspetsado in atbang la han Quarantine Unit ngan hiya gihapon an nagbabantay han mga gamit han contractor samtang gintutukod an nasabi nga facilidad.
An suspetsado in mayda live-in partner samtang an biktima in inasaw-an. #
